Monday, August 4, 2008

WC انا رايح ال

ليا صديق قادته الصدفة الى الاجتماع بسفير مصر فى اليابان - السيد / هشام بدر - وهو من الشخصيات المصرية البارزة . وأثناء حديثهم قام احد الجالسين فقال :" WC انا رايح ال "
فناداه السفير :"تعالى هنا ، انتا منين يا بنى ؟"

قاله : " من مصر "

" ايوة يعنى منين فى مصر ؟

" من الزقازيق

" طب بذمتك انتا تعرف يعنى ايه الحرفين دول ؟

طبعا قاله لا ، بعد كدة السفير قال وهوا بيوجه كلامه لكل الموجودين ، اراهن ان 99 % منكم ميعرفش الكلمتين اللى الحرفين دول اختصار ليهم .
صاحبى قاله انا عارف بس مش بقول كدا بقول رايح الحمام

قاله " طب ايه هما ؟

قاله : Water circut

قاله : شاطر برافو عليك ، وبعدين وجه كلامه للكل وقال بخفة دم : خلى حد فيكم يغلط ويستخدم كلمة انجليزى وسط كلامه بالعربى كدة وشوفوا هعمل فيه ايه :)

دى ازمتنا يا ناس ، عشان العالم المتقدم بيستخدم اللغة دى فى تعاملاته ، يبقى احنا كمان لازم نتمدن ، وكأن دول جنوب شرق اسيا دول متخلفة ، دى دول لغاتها مش سهلة ورغم كدة متمسكة بيها ومتغيرتيش للانجليزية رغم انها اللغة الاولى فى العالم واللى انتشرت بفضل الاستعمار ليس اكثر

انا كتبت الكلمتين دول عشان عندنا فى الشركة ، وهى شركة خاصة ، بيتشدقوا بالمصطلحات الكبيرة فى اى ميل ، لان الشغل كله انجليزى ، وفى النهاية ايه النتيجة ؟ المصرى مصرى ، الشغل كله بزرميت للاسف فى اكبر كول سنتر فى الشرق الاوسط

مافيش فايدة

2 comments:

مَصري said...

أستازي
اللي احنا بنتكلمهُ مش عربي.
و إحنا بنخلط بين مفاهيم اللغة كتير.
إحنا المفروض نحافظ علىٰ لغتنا الحالية اللي ثقافة الإحتلال العربي بتحب تسميها لهجةعامية(و كإننا زبالة و رعاع) ل درجة انهم خلونا نتبنا فكرهم، و شوف بنفسك وصلنا لفين مع فكرهم الحقود.

اللغة مهمة جدا، و اوروپا فهمت من زمان أهميتها، و عشان كده إرتقت، و انجلترا من زمان عرفة اهمية الإعتراف بلغتها الحديثة. و زي ما الانجليزي إتفرض بالقوة، العربي بردو، و طول مانت بتقول علىٰ نفسك عربي، انت كده مش وطني و بترمي مصر في الزبالة، يعني مالكش أصل.
و اللي غصب علىٰ المصريين إنهم يؤمنو بفكرة العروبة بالغصب، الايام المميتة بتاعة عبد الناصر اللي إنقلبو علىٰ الحرية و علىٰ مصر.
بنصحك بإنك تقرا ده
http://incubator.wikimedia.org/wiki/Wp/arz/%D8%A7%D9%84%D9%82%D9%88%D9%85%D9%8A%D8%A9_%D8%A7%D9%84%D9%85%D8%B5%D8%B1%D9%8A%D8%A9#.D9.85.D8.A7_.D8.A8.D9.8A.D9.86_.D8.A7.D9.84.D8.AD.D8.B1.D8.A8.D9.8A.D9.86

Mahmoud25x said...

يا عزيزى اهلا بيك فى المدونة واسمحلى ارد عليك :
انا قرأت الكلام على اللينك دا وانا مقتنع بيه تماما بس عايز اقول نقطة معينة .
انا شايف اننا مصريين مش عرب ، يعنى لينا خصوصيتنا ، بس معترض اننا نعتبر ان دخول العرب مصر افسد الخصوصية دى تماما ، رغم العيوب اللى فيها او فى اصحاب الثقافة دى لعدة اسباب.
اهمهم ان طبيعة الاشياء التغيير ، ومفيش حضارة فضلت زى مهيا ، طبيعى تمر بمراحل حتى الأفول . انا جايلك فى الكلام اهو .
انا شايف ان المصرى زيه زى غيره طبيعى يتعرض للتغيير ، التغيير فى البلد دى ليه طابع خاص جدا عشان احنا مصريين ، كون الشعب لغته وديانته تتغير اكتر من مرة مش دى المشكلة ، لان من العدل اننا نعترف ان الحضارة الاسلامية ، ليها قيمتها زى مكان للفرعونية قيمتها مع الاختلاف . مينفعش بقى نقول ان الفرعونية احسن عشان هيا الاول ! انما المزيج اللى بيكون الشخصية المصرية بيدل على تميزه كمصرى ، ازاى قدر يستوعب كل حضارة وكل لغة وبرضه لما ييجى يتكلم عربى يروح متكلم لغة فيها كتير من اللغة الفرعونية القديمة او الديموطيقية ، انا مش متخصص اوى يعنى .
المهم انى مقتنع بان دى طبيعة الاشياء ومش متحيز لثقافة على حساب غيرها ، المشكلة ان الثقافة الاسلامية جتلنا عن طريق العرب لانها منشأ الثقافة دى ، وحصل ان فى بعض العادات المرتبطة بالعرب نفسهم تم الصاقها بالاسلام وبقت موجودة فى مصر ، هل دا معناه ان العيب فى الاسلام؟ اصلى بصراحة حاسس ان فى هجوم غير مبرر على الثقافة الاسلامية ودا غريب جدا ، ممكن تنتقد شخص لكن فى امور متفق عليها وياريتنى كنت متخصص عشان اقدر اتكلم بالتفصيل .

شكرا لمرورك واتمنى التواصل