Tuesday, May 19, 2009

صور من حياتنا المقرفة:(

*مشهد 1 :
قاعد فى أتوبيس(مينى باص ) وواحد ورايا عمال يقرا قرآن بصوت عالى ،وكل مصوت الموتور يعلى يعلى صوته،وطبعا صوته مش حلو ومحدش مركز معاه اصلا

*مشهد 2 :
قاعد فى ميكروباص سواقه مجنون كالعادة،واحد من العمال راكبين وفرحان بموبايله اللى فيه اغانى هابطة ومشغلهم ومعلى الصوت عالآخر،وفى نفس الوقت السواق مشغل اغانى،واحد بيقوله بذوق:وطيه شوية عشان الصداع،قاله يعنى ام كلثوم (اللى السواق مشغلها) مش عاملك صداع؟
فى النهاية السواق شغله قرآن عشان يشوف أخرتها ايه معاه، وقد كان

*مشهد 3 :
راكب ميكروباص من رمسيس راجع زهراء م نصر وقاعد فى الكنبة اللى ورا،واحد قاعد جنبى اول موصلنا سأل السواق : راجع تانى يا اسطى؟!

*مشهد 4 :
راكب الباص بتاع الشغل ومريح فى التكييف ،تناهى الى مسامعى كام واحد ورايا بيتكلموا عن تمثال رمسيس ساعة ما نقلوه ودار الحوار التالى على ما اتذكر :
-الفراعنة كفرة؟
=والله هما عملوا حاجات كويسة برضه يعنى مش كفرة ووحشين علطول!عملوا حاجات كويسة وحاجات وحشة!!!
-هوا التمثال دا الأصلى ولا اللى فى مصر الجديدة؟
=دا الأصلى

*مشهد 5 :
واحنا بنشتغل فى الشركة اللى بيشتغل فيها بتاع 4 الاف موظف،واللى هيا اكبر كونتاكت سينتر فى الشرق الأوسط واسمها(اكسيد)،كنا مستنيين الحوافز بتاعة 3 شهور والحمد لله بعد طول انتظار قبضنا مبلغ كبير معرفتش اعمل بيه ايه ( 90 جنبه )

**** كفاية دول مؤقتاً

:(

1 comment:

إيناس حليم said...

ههههههههههههههه
كل المشاهد احلى من بعض
خصوصا الحوار بتاع تمثال رمسيس ده
:)
مش عارفة الناس المهيسين في مصر كترو كدة ليه

بس جميل تأملك لمن حولك
تقبل تحياتي