Tuesday, June 24, 2008

عفوا قاهرتى العزيزة .. انى راحل

عفوا قاهرتى العزيزة التى عشقتها وأظنها فعلت ..انى اعتذر
اعتذر لبائعة الذرة المشوية ولبائعة الهوى
اعتذر لكل الميادين والتماثيل ولكل وسائل المواصلات
لك ايتها الحافلات ولك سيارات الأجرة
لكل الأنفاق والكبارى ، لكل الوجوه وكل شئ
اعتذر لكل هؤلاء لاننى لن اراكم ثانية
لا اعلم من منا الخاسر ولكن يقينى انه انا
ربما اعدل عن قرارى ؟
ولكن كيف وقد حزمت حقائبى
ترى هل تحدث المعجزة واجد نفسى نائما ؟
ترانى اهذى ؟
لم اعد متأكدا من اى شئ سوى اللاشئ حتى وان بدت الكلمة غريبة
عزيزتى اعزائى
عفوا
لن ابقى بعد الان
عفوا !!

9 comments:

Bella said...

رايح فين؟؟

الله...الوطن...أما نشوف!!! said...

عندي احساس بيكبر جوايا كل يوم ان الناس كلها ماشية وسايبة البلد ودة احساس بيخوفني وبيحسسني بوحدة

Mahmoud25x said...

عزيزتى
الحقيقة دا احساس مخوفنى انا كمان برضه
والوحدة دى للاف احنا حاسين بيها فعلا مش لسة هنحس بيها

Mahmoud25x said...

عزيزتى بيلا
انا مش هروح فى اى مكان تانى
بس مش هفضل هنا برضه
فهمتى حاجة ؟ :)

Bella said...

اهلا محمود

ايوة فهمت

فهمت ان الاغتراب الداخلي اصبح مقرر علينا جميعا

نحيا في هذا الوطن دون ان نشعر اننا فيه

احساس سخيف جدا ان تشعر بانه لامكان لك في اي مكان وانك غريب بين الاهل والاصدقاء

عموما انا ساعات باحاول اتغلب على شعور الغربة ده باني اعيش في مكان تاني بروحي
يعني وانا باتفرج على فيلم اجنبي احاول استمتع قدر الامكان بماشاهد

وهكذا

كان نفسي الامور تكون افضل ولانشعر هذه المشاعر

ربنا يهون علينا كلنا

تحياتي

Mahmoud25x said...

بالظبط يا بيلا هوا دا
انا كمان بحاول اعمل كدة كتيييير اوى
وبحس انى بروح بجسمى كمان مش بس بروحى
ودا بيدل طبعا عن رفض تام وشامل وكامل للواقع
احيانا بحن للماضى بتاعى
بس يمكن عشان هوا ماضى بس

Bella said...

وانا كمان باعمل كده
باحس اني فعلا متوحدة بالكامل مع كل لقطة في الفيلم حتى لو فيلم بايخ باقعد اشوفه برضه

ههههههههههه

ويمكن لاني عشت فترة برة ده بيزود من احساسي بالغربة اكتر

وكمان الحنين للماضي ملازمني جدا

واحد من المسلمين said...

سلام عليكم

أخى محمود .. شايف ان ده حل .. انك تيب البلد بجسمك أو بروحك أو حتى بفكرك

كل البلاد اللى انت شايفها متقدمة دلوقتى عانى فيها ناس من زمان علشان يخلوها كده

واحد قريبى بيشتغل فى السعودية قاللى مرة انه هناك بيتعامل وماطن درجة تانية وده طبيعى ولكن المشكله انه هنا برده بيتعامل مواطن درجة تانيه .. وبيقول انا امتى هاتعامل مواطن درجة أولى

وأنا بأجاوب ليك على السؤال ده .. مش هانتعامل مواطنين درجة أولى إلا لما نعمل حاجة للبلد علشان تبقى حاجة بينا أو بأولادنا أو بأحفادنا مش مهم

أنا تعلمت من النبى الكريم محمد صلى الله عليه وسلم منتهى الإيجابية فى الحديث
إذا قامت القيامة وفى يد أحدكم فسيلة فليزرعها

أخوك .. واحد من المسلمين

Mahmoud25x said...

واحد من المسلمين اهلا بيك اولا
ثانيا انا يا سيدى ولا ماشى ولا حاجة ولا بروحى ولا بجسمى
لكن انا بتكلم عشان متخنقش مش اكتر
انا متفق معاك تماما فى كلامك رغم انى مش قادر افيد البلد بحاجة ومحدش مدينى فرصة اعمل كدة لا انا ولا غيرى
بس على كل حال حتى لو سافرت انا روحى فيها
وربنا يقدرنا ونقدر نغير للاحسن
صدقنى نفسى بس حاسس ان اللى ماسكينها عايزنها تفضل كدة خرابة
دنتا لو شغال فى مكان محدود الصلاحيات ومديرك حس انك بتفهم وممكن توجعله دماغه بيزهقك عشان تمشى
ربنا يستر على البلد
امين :)